Lanuzteekin jarraitzea erabaki dute Laminaciones Arreguiko langileek

Laminaciones Arregui enpresaren lantegiak Gasteizen eta Urbinan daude. / LAB sindikatua

Otsailaren 6tik, egunero lanuzteak egin dituzte langileek, enpresako zuzendaritzak kaleratzeei alternatibak bilatzeko negoziazioak eten ostean. Lanuzteekin jarraitzea erabaki dute, eta ostegunean mobilizazioak deitu dituzte.

Enpresako zuzendaritzak Eusko Jaurlaritzaren Lan Harremanetarako Zuzendaritzaren eta Arabako Lan Ordezkaritzaren bitartekaritzari uko egin eta   negoziazioak "amaitutzat" eman ostean, enpresa batzordeak lanuzteak deitu zituen otsailaren 6tik aurrera.

Hamabi egun hauetan, egunero lanuzte partzialak egin ditu plantillak, eta enpresak, ordea, langileen proposamenak "entzun nahi ere ez" dituela salatu du Laminaciones Arreguiko enpresa batzordeak.

Hortaz, lanuzteekin jarraitzea erabaki dute aste honetan ere; gutxienez ostegunera arte luzatuko dituzte, "gatazka ikusarazteko" eta Gasteizko zein Urbinako lantegien etorkizuna bermatu dezaten exijitzeko.

Otsailaren 20an mobilizazioak

Batzarrean bilduta, plantillaren "babes zabalarekin" berretsi dituzte lanuzteak eta mobilizazioak. Lanuzteak iragan astean baino luzeagoak izango dira, eta bi orduko iraupena izango dute: 10:30etik 12:30era, goizeko txandan eta lanaldi zatitua duten langileen kasuan; 18:30etik 20:30era arratsaldeko txandan; eta 4:00etatik 6:00etara gaueko txandan.

Mobilizazio eguna izango da osteguna Laminaciones Arreguiko langileentzat. Izan ere, 11:20ean elkarretaratzea deitu dute Eusko Jaurlaritzaren aurrean. Horrez gain, arratsaldean manifestazioa egingo dute Gasteizko erdialdetik; 19:00etan abiatuko da Bilbo plazatik, "lanpostuen eta etorkizunaren defentsan".

"Itxiera programatu bat" etor daitekeela ohartarazi du enpresa batzordeak, eta 2012. urtean izandako antzeko egoera saihesteko eskatu diote zuzendaritzari. Garai hartan, kaleratze kolektiboak jasotzen zituen ERE bat proposatu zuen enpresak; lan gatazka gogor baten ostean, baliogabetuta gelditu zen.

Zazpi urte eta gero, enpresak kaleratzeei berriro heldu nahi diela salatu dute langileek.

Erlazionatuak

Lanuzteak Laminaciones Arreguin "enpleguaren defentsan"

Araba

Enpresako zuzendaritzak plantilla murrizteko kaleratzeei alternatibak bilatzeko negoziazioak eten dituela salatzeko, lanuzteak egiten ari dira Cels...

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide