Joan den uztailean jaio zen Herri Txikiak Bat ekimena, hainbat gazte arabarrek herri txikien bizitza suspertzea xede sortutako asanblada. Mugimendu horren ondorioz, urriaren 12an ospatu zuten lehen Herri Txikien eguna, Argantzonen. Egun hori egitasmoaren helburuak gizarteratzeko mugarri izan zen, baina hilabete hauetan lanean jarraitu dute, larunbatean Markizen egindako prentsa agerraldi batean adierazi dutenez.
Mugimenduaren helburu nagusia bere horretan mantentzen da: herri txikien inguruan dauden "hutsune zein gabeziak" salatzea, eta "herri txikien ahotsa ordezkatzea". Norabide horretan, hiru lerro nagusi jorratu dituzte orain arte: herrien arteko saretzea, erantzun kolektiboak eman ahal izateko; herriak euskalduntzea, eta despopulazioari aurre egitea. Herri txikien egoerari buruzko diagnosia ere egin dute, zerbitzuak, komertzioa, aisialdia, egitura politikoa eta etxebizitza kontuan hartuta.
Arlo praktikoari begira, besteak beste, tokian tokiko merkataritza sustatzeko formulak bilatzeari ekin diote, lan-eskaintzak eta lan-baldintzak hobetzeko helburuarekin.
Datorren urtean izango duten antolaketa ere azaldu dute: hilabetean behin asanblada egingo dute, eta asanblada bakoitza herri desberdin batean egingo dute. Modu berean, hitzordu bakoitzean arazo zehatz bat landuko dutela aurreratu dute.