Araban azken asteotan atzeman diren bi otsoak ez hiltzeko eskatu diote ekologistek Arabako Diputazioari. Horretarako, Change.org plataformaren bitartez eskaera bat abiatu dute. Dagoeneko 8.000 lagunek baino gehiago babestu dute eskaera hori. Bertan azaltzen denez, Diputazioaren erabakiaren atzean "abeltzaintzaren sektorearen presioa" dago.
Ekologisten aburuz, ulergaitza da Diputazioak aurreratu duen asmoa: "guztiz inkongruentea eta arduragabea da Euskadin otsoa katalogatzeko espedientea irekita dagoen bitartean Arabako Aldundiak aleak akabatzeko baimena ematea". Hala, "zentzugabekeriatzat" jo dute erakunde publikoak hartutako bidea. "Aldundiak eskaintzen duen irtenbidea da gure probintzian espezie bat erabat desagerraraztea, otsoei existitzen utzi gabe".
Ekosistemen kudeaketan eskopetak erabili ordez, prebentzio neurriak eskatu dituzte. Duela hainbat hilabete azaldu zituzten neurri horietako batzuk: abeltzaintzan oinarritutako eredua baino, artzaintza bera sustatzea; abereak gauez biltzea, eta trebatutako txakurren erabilpen egokia egitea.