Euskaraldiaren edizio berriaren prestaketa lanak abian dira, eta ekarriko dituen berrikuntza horien berri emateko lurralde foroak antolatu dituzte herri batzordeetako kideentzat. Egin beharrekoak, mugarriak eta zereginak azaldu eta elkarbanatzea izango da topaketaren helburua, sustatzaileek azaldu dutenez.
2020ko azaroaren 20tik abenduaren 4ra, 15 egunez, egingo da hurrengo Euskaraldia. Hain zuzen euskaraz gehiago egitea izango da bigarren edizioaren xedea eta, horregatik, Gehiago, gehiagorekin, gehiagotan leloa aukeratu dute.
Arabari dagokionez, besteak beste, 20 bat herritan eta Gasteizko bospasei auzotan eratu dira batzordeak; baina hurrengo asteetan batzorde berriak eratuko direla adierazi dute. Bi hilean behin inguru biltzen da honako foroa, kontu komunak lantzeko, ideiak trukatu, elkar ezagutu eta unean uneko egitekoei erantzuteko.
Nobedade gisa, mota guztietako entitateak batuko zaizkie belarriprest eta ahobizi izango diren lagunei. Horretarako, ariguneak sortuko dituzte entitateetan. Dagoeneko hauek inskribatzeko aukera dago Euskaraldiaren webgunean eta, beraz, Euskaraldiari begira lanketa egiten hasteko aldia ireki da jada.
