Ikasturte honetan 500 mintzalagun baino gehiago izango dira

Urriaren 31n amaituko da Mintzalaguna egitasmoan izena emateko epea./ Irudia: Mintzalaguna

Gaur, urriaren 31n, Mintzalagun izan nahi duten lagunen izen-ematea amaituko da. 500 mintzalagun inguruk parte hartuko dute ikasturte honetan. Horietako 165 berriak dira.

Urriaren hasieran abiatu zen aurtengo Mintzalagunaren izen-ematea. Asteotan, Euskal Herri osoko bizilagunak “Mintzalagunon mundura” gonbidatzeko kale ekintza parte-hartzaileak antolatu dituzte eta, gaur, amaituko da izena emateko epea.

GEU elkarteak ALEAri aurreratutako datuen arabera, 165 mintzalagun berri izango dira 2019/2020 ikasturtean. Hortaz, 500 lagun inguru izango dira dagoeneko euskararen erabilera bultzatzeko proiektu honen parte.


Euskarazko komunitate bat baino gehiago

Mintzapraktika bospasei laguneko taldeetan elkartuta egiten da eta parte hartzeko soilik oinarrizko bi baldintza bete behar dira: euskaraz komunikatzeko gai izatea eta astean ordubetez elkartzeko prest egotea.
 
Mintzalagunaren sustatzaileek argi definitzen dute proiektua: "Mintzalagunen komunitatea ez da soilik elkarrekin euskaraz hitz egiteko tartea, baizik eta esperientziaz, bizipenez eta emozioez osoturiko mundu zabal bat".
 
Eta zer da mintzalagunek bilatzen dutena? Haien arabera, "denek dute helburu komun bat, aisialdian euskaraz gozatzea", baina denborak aurrera egin ahala "hizkuntzaz haratago doazen beste emozio eta bizipen batzuekin egiten dute topo mintzalagunek".
page2image59729856

Mintzapraktika egitasmoetan izena emateko aukera eta informazioa herri edo eskualdeko euskara elkartean, euskaltegian, Udalean edo www.mintzalaguna.eus webgunean eskuragarri dago. Azken orduak dira izena emateko.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide