Iritsi da kontuak emateko garaia

Aurrez egindako aitorpenak onartzeko, edo horiek aldatzeko hitzordua eskatu aldera, doako telefonoak prestatu ditu Ogasunak. / ALEA

Gazteentzako eta herri txikietan bizi diren lagunentzako kenkariak hobetu dituzte aurtengo errenta kanpainan. Batez bestean, mila euro inguru jasoko dituzte bueltan hamar arabarretik seik.

Arabarren %65ek aitorpen negatiboa izango dute aurtengo errenta kanpainan, eta, hortaz, Diputazioak zergetan ordaindutako diruaren zati bat itzuli beharko die, foru erakundeak berak egindako aurreikuspenen arabera: batez bestean 987 euro izango direla kalkulatu dute.


Ohi bezala, apirilaren 5ean hasiko den kanpainan Rentafacil modalitatea erabiliko dute: 115.000 inguru etxetara aurrez egindako aitorpenak bidaliko dizkiete, "inoizko kopururik handiena", erakundearen hitzetan.

Aurten, alokairuan bizi diren 30 urtetik beherako gazteei %30 arte handitu diete etxebizitza gastuei lotutako kenkaria. Modu horretan, urteko 2.400 euro arte desgrabatu ahal izango dituzte. Egoera horretan 1.800 gazte inguru daudela uste du Diputazioak.

Bestalde, 4.000 biztanletik beherako udalerrietan bizi direnek kenkari handiagoa izango dute, eta landa eremuan ohiko etxebizitza erosten dutenek ere %20 kenkari gehiago izango dute (30 urtetik beherako gazteen eta familia ugarien kasuan %25 arte handitu dute portzentajea).

Kudeaketak "errazagoak, irisgarriagoak eta azkarragoak" izango direla zirtatu du Diputazioak, eta, horretarako, zerbitzu berriak prestatu ditu. Batetik, doako telefonoak erabili ahal izango dira  zenbait kudeaketa egiteko: Rentafacil  proposamenak onartzeko edo horiek aldatzeko hitzordua eskatzeko 900 111 202 telefonora deitu ahal izango da, eta Ogasuneko bulegoetan aitorpena egiteko hitzordua eskatzeko, berriz, 900 111 203 zenbakira. Sakelako telefonoetarako aplikazioa ere prestatu dute, hitzordua eta zerga datuak eskatzeko.

Ondarearen gaineko zergaren kanpaina ere abiatu dute. 1.540 arabarrek egin beharko dute aitorpen hori: 2 milioi euro baino gehiagoko ondasun edo eskubideak dituztenak edo 800.000 euro baino gehiagoko ondare garbia duten lagunak, hain zuen. Hauen partez 17,5 milioi euro jasotzea espero dute; batez bestean, 11.364 euro inguru bakoitzeko.

Erlazionatuak

Errenta aitorpena egiteko kanpaina apirilaren 5ean hasiko da

Araba

Aste honetan hasiko da Diputazioa zergadunen etxeetara proposamenak bidaltzen.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide