Badator Euskaraldia

Ostiralean hasiko de Euskaraldia eta 11 egunez hizkuntz ohiturak aldatzeko hautua egingo dute milaka euskaltzalek.

Izen-emateak zabalik jarraitzen badu ere, dagoeneko milaka euskaldunek eman dute izena Euskaraldian. Gure lurraldeko eremu guztietan ere ehunka lagunek egin dute ahobizi eta belarriprest izateko hautua.

Izena eman duten guztiek Euskaraldia hasi baino lehen beraien txapa jaso beharko dute; tokian tokiko batzordeek adierazitako lekuetan, eta Gasteizen, edozein gizarte etxetan zein Oihaneder Euskararen Etxean.

Euskaraldian parte hartuko duten lagun guztiei ikerketa bat egin ahal izateko datuak ematea eskatzen zaie gainera. Garrantzitsua da ariketa sozial honek ematen dituen emaitzak baloratu eta etorkizunera begira eman beharreko pausuak zehazten laguntzeko. Galdetegia online bete daiteke galdera erraz batzuei erantzuna emanez

ALEA ere Euskaraldiarekin bat

ALEAko lantade guztiak ere bat egin nahi izan dugu Euskaraldiarekin eta gaur goizean izan gara Oihaneder Euskararen Etxean. Bakoitzak bere txapa jaso, eta azken orduko izen-emate bat tarteko, gu ere prest gaude hamaika egun iraungo dituen erronkari eusteko.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide