"Arabarrok euskarazko komunikabide duinak merezi ditugu". Argi du hori ALEAk, Araba mailako euskarazko idatzizko hedabide bakarra. Hori dela eta, "hobetzen jarraitzeko konpromisoarekin", papereko aldizkaria berritu du.
Asko dira egindako aldaketak: egunkari-itxurako paper fina atzean utzita, orrialde gogorragoak inprimatuko dituzte aurrerantzean; era berean, irakurketa atseginagoa izan dadin, diseinua freskatu dute, irudiei eta, oro har, orrialdeen maketazioari, arreta berezia jarriz.
Itxura bakarrik ez: gaien egitura ere aldatu egin du ALEAk. Atal berriak aurkeztu ditu, tartean, asteroko Arabako Txokoa eta antzerki- eta diseinu- kolaborazio berriak. Iritzi-atalari ere espazio gehiago eskainiko dio, eta, gaiak Kuadrillaka antolatu beharrean, gaika eskainiko ditu, betiere lurralde osoko ikuspegia galdu gabe.
Bestalde, proiektua ezagunago egin nahi dute lurraldean, eta, horretarako, komunikazio-lan egonkorra egin nahi dute udaberritik aurrera.
"ALEA proiektua guztion artean eraiki beharrekoa da", azaldu dute. Horretarako, ekarpenak eta kolaborazio-proposamenak jasotzeko helbidea eman dute: erredakzioa@alea.eus
ALEA aldizkaria astero etxean jaso nahi baduzu: Izan zaitez harpidedun!
