Urriaren 25ean, euskarazko Wikipedia eta umeentzako Vikidia entziklopedian artikuluak idatzi eta editatzeko jarduera egingo da Gasteizko Campuseko Letren fakultatean. Euskal Wikilarien Elkarteko kide batzuen eta zenbait irakasleren laguntzarekin, Campuseko ikasle-irakasleak eta animatzen den oro joan daiteke euskarazko Wikipedia eta Vikidiarako artikuluak idaztera. Zehazki, Gasteizko unibertsitatean ematen diren ikasketekin loturiko edukiak landuko dira bereziki, baina Gasteiz eta Arabako emakumeei buruzko artikuluak ere landu ahal izango dira, emakumezkoen presentzia handitzeko.
Vikidiaren kasuan, 8 eta 13 urte bitarteko eskolumeentzako artikuluak egingo dira, baina ez bakarrik umeen eskola-beharrei begira, baita adin tarte horretako ume euskaldunei interesatzen zaien beste edozein gairi buruzkoak ere. Jarduera 9:00etan hasi eta 16:00ak arte luzatuko da.
Mintegiak urrian
Wikipedia eta Vikidiaren funtzionamenduaren berri jakin nahi duten ikasle nahiz erabiltzaileentzat, gainera, mintegi bat antolatu da hilaren 9, 16 eta 23rako, goizeko 11:00etatik 13:00etara, Xabier Armendaritz, Euskal Wikilarien Elkarteko lehendakariarekin. Interneteko entziklopedia horietan artikuluak nola idatzi eta editatu ikasi ahal izango da mintegian. Bertan parte hartu nahi dutenek izena eman behar dute urriaren 9a baino lehen, wikimintegia@gmail.com e-postan.