Arabako, Kataluniako, Nafarroako, Estatu Batuetako, Estoniako edo Frantziako adituak Gasteizko Biltzar Jauregian bildu dira gaur Espainian bisoi europarra kontserbatzeko ikuspegi berriak izeneko mintegian. Bertan, LIFE Lutreola proiektu europarraren barruan egiten diren lanak partekatu dituzte, eta besteak beste, bisoi europarraz aritu dira.
Diputazioa baikor agertu da egun espezie honek lurraldean bizi duen egoerarekin. "Urte hauetan guztietan egin den lanari esker, bi hamarkada beranduago, baikorrak izan gaitezke bisoi europarraren etorkizunari dagokionez", azaldu du Amaia Barredo Aldundiko Ingurumen zuzendariak.
Hamasei ale Araban
Bisoi amerikarraren kontrolari edo tranpa metodo berriei esker, bisoi europarraren 16 ale aurkitu dira dagoeneko Araban. "Hiru urte lehenago, aldiz, bat bera ere ezin genuen aurkitu”, adierazi du Barredok.
Era berean, animaliak itxian hazteko zentro gisa Arabak izan duen papera nabarmendu du, baita besteñako kontserbazio neurri batzuk ere.
Horrela, 1997tik geroztik, 556 bisoi amerikar harrapatu dira Araban. Gehienezko kopurua 2015ean lortu da, 150 harrapaketa, ibaietan instalatu diren ur gaineko plataforma horiei esker. Ondoren, espezie inbaditzailearen presentziak behera egin du, eta 2016an hamar animalia bakarrik harrapatu ziren.
Europako LIFE Lutreola proiektuaren esparruan, Aldundiak bideo bat zabaldu du gure lurraldean espezie hau kontserbatzeko hartu diren neurriei buruzko informazioa eman eta herritarrak espeziea babesteari buruz sentsibilizatu nahian.
