2021eko maiatzean jaso zuten katu baten lehen momia Arabako Zaharberrikuntza Zerbitzuaren instalazioetan. Baserria berritzen ari zela topatu zuen erakundeko kide batek. Florian izena jarri zioten, jaso zuteneko egunaren santuaren omenez.
Bada, iragan urriaren 14ean, bigarren katu momifikatu bat jaso zuten Zaharberrikuntza Zerbitzuan. @FlorianKatua X kontuak berri eman duenez, Kuartangoko udalerrian zaharberritzen ari diren eliza baten armairu batean agertu da katua, momifikatua; eta argazkietan ikusten denez, oso egoera onean. Kontserbazio protokoloen arabera, hilabete egon behar da anoxian sartuta katuaren momia. Horrela, bermatuko dute sitsak edo beste zomorroren batzuk baditu ezin dituela inguruko elementuak kutsatu, eta bide batez momia kolokan jar dezaketen sitsen erasoetatik babestuko dute.
Calixto izena jarri diote Arabako bigarren katu momifikatuari, jaso duten egun santuaren omenez.