Guztira, bost hektarea inguruko babes eremua ezarri du Eusko Jaurlaritzak Badaiako Santa Katalina monumentu multzoa izendatzeko abiatu duen espedientean. Lorategiak eta bere inguruak dituen balio kulturalen artean, Jaurlaritzak azpimarratu du Santa Katalinako multzoak potentzial arkeologiko handia daukala "azterketa historiko eta arkeologiko integral bat egiteko".
Jatorrizko dorrea, eliza, Iruñatarren jauretxea, komentua eta klaustroa babestuko ditu izendapenak, baita azpiegitura hidraulikoaren kanpoko uharkak ere, eta horien inguruak. Perimetroak aparkalekutik lorategira sartzeko bidea eta ekialdeko muturrean, piknik gunea hartzen ditu.
Momentuz, itxita
Monumentu multzoa izendatzeko izapideak jarraitzen duen bitartean, Iruña Okako Udalak martxan du Europako Next Generation funtsek finantzatutako obrak egiteko proiektua. Horretarako inbertsioa milioi bat eurokoa da, eta bitartean, lorategi botanikoak itxita jarraituko du. Halere, obra egiten den bitartean eta ahal den guztietan, Lorategiaren Lagunen Elkarteak antolatzen dituen jarduerei eutsiko die udalak, eta bisita gidatu zehatz batzuk ere antolatu ditu azken hilabeteetan.
Next Generation funtsak euriaren urak biltzeko erabiliko dira, ureztatze-sistema hornitzeko. Erdi Aroan eraiki zen mekanismoaren antzekoa eraiki nahi dute; ezkutuan dago oraindik ere, eta akueduktu txikiak ditu. Halaber, eguzki-plaka batzuk kokatuko dira, auto elektrikoak kargatzeko gune bat eta zaintza-kamerak parkeko hainbat puntutan, fauna behatzeko.
Badaiako Santa Katalina erabat suntsituta geratu zen lehen gerra karlistan, 1836an, eta, ordutik, espazioa ahaztuta geratu zen, eta eraikinak erori ziren. 2000. urtean, Iruña Okako Udalak lursailak erosi eta zaharberritze-lanak hasi zituen. Indusketa arkeologikoak ere egin ziren, eta komentuko klaustroa argitara atera zen. Gainera, botanika berreskuratzeko lan handia egin da urte luzez, eta egun Arabako lorategi botaniko ezagunenetakoa da.