Zamudiotarren oinetxea XVII. mendeko jauregia da. Fatxada nagusian, armarri bat ageri da, Zamudiotarrena eta Portilla hiribilduarena, Arabako armarriaren jatorria, hain zuzen ere. Bada, iragan astean, hauteskunde kanpaina betean, etxearen atean kokatu zituen EAJk bere kartelak, "sikaflexarekin eta zinta itsaskorrarekin", etxeko jabeek salatu dutenez. Zamudiotarren etxea, "eraikin babestua da ondare aldetik duen baloreagatik", esan dute.
Egindakoa ikusita, Zanbranako Udalera jo zuten jabeek, eta Peio Ruiz Garciarekin, EAJko buruarekin, hitz egiteko gomendatu zion familiari Aitor Abezia alkateak, atea zegoen bezala uzteko eskatzeko. Iker Pinedo etxeko jabeak ALEAri azaldu dionez, "berarekin hitz egin ondoren, kalteak konponduko zizkigun margolari bat bilatu eta aurrekontu bat bidali genion. Gaur, berriro hitz egin dugu berarekin ez dugulako erantzunik jaso, eta atea margotuta zegoela argudiatu du". Pinedok azaldu duenez, familiaren baimenik gabe, kaltetutako atea margotu dute jelkideek eta "benetako lardaskeria egin digute". Horregatik, atzo arratsaldean, Ertzaintzaren aurrean salaketa jarri zuen familiak, egindako kalteengatik.