Estavilloko Tourseko San Martin eliza da Ondare Irekia izeneko programaren baitan Erdi Aroko Araba elkarteak modu birtualean "ireki" duen azken eliza. Berezko aplikaziorik behar izan gabe, web nabigatzaile hutsaren bitartez elizaren barruko aldeak 360 gradutan ezagutzeko parada ematen du egitasmoak. Horrez gain, eta testuingurua finkatu aldera, eraikinari buruzko bestelako informazio osatua eskaintzen dute webgunean.
Iraganean herri estrategikotzat jo dute Estavillo, Zadorra ibaira begira dagoen malda batean kokatuta, Done Jakue eta Frantziako gorterako bideen artean, gainera. "Araban dokumentatuta dauden herrietatik zaharrenetarikoa" dela adierazi dute Erdi Aroko Araba elkarteko arduradunek, 871. urtean monasterio baten dohaintza batean ageri baita, Stavellu izenpean.
Bertako eliza Erdi Aroan herriak izan zuen garrantziaren adierazle da. Dena dela, eta hasiera erromanikoa izan arren, gotikoaren garaikoak dira ondorengo konponketak, eta estilo berria are adierazgarriagoa da barruan. Bertako artelanek erromanismo izeneko joera artistikoa argi adierazten dute, Italiako Errenazimenduaren eragina dela eta.
