Barrongo urtegiaren beharrari buruz, Arabako Foru Aldundiak finantzatu duen eta Nueva Cultura del Agua fundazioak landu duen lehen txostena ostiralean aurkeztuko dute, Espejoko gizarte etxean, 16:00etatik aurrera. Arabako haranen oraina eta geroa titulupean egingo dira tailer bat eta ondoren eztabaida. Batzar irekia izango da, eta bi dokumentu aurkeztuko dituzte: Arabako Haranen etorkizunaren diagnostiko soziala, eta Ureztatzea hobetzeko eta berritzeko egitasmoari buruzko txosten teknikoa.
Aldi berean, egun hauetan inkesta bat banatzen ari dira Añana eskualde osoan, herritarrek Barrongo urtegiaren egitasmoaren inguruan duten iritzia ezagutzeko.
Aurretik bildu dira Arabako Diputazioarekin, Erriberagoitia, Lantaron, Gaubea eta Gesaltza-Añanako alkateekin eta tokiko turismo eragileekin; halaber, tokiko nekazariekin eta ganaduzaleekin egon dira. Urtegiaren proiektuarekin konprometituta dauden UAGA sindikatuarekin eta Tumecillo Ureztatzaileen Elkartearekin hitz egin dute batetik, eta, bestetik, lehorreko laboreak dituzten nekazariekin –urtegia behar ez dutenak– eta ekologikoan ari direnekin.
EH Bilduk eta Podemosek foru aurrekontuen negoziazioan proposatu zuten eztabaida eta diagnostiko hori abiatzea, eta EAJk onartu zuen. Hartara, Nueva Cultura del Agua izeneko fundazioari esleitu zion Diputazioak, iragan maiatzean, Barrongo urtegiaren inguruko parte-hartze prozesuaren gidaritza. Dena den, prozesuaren ondorioak eta emaitzak ez dira lotesleak izango.