Orain arte ofizialki Aiarako Kuadrilla zena Aiaraldeko Kuadrilla izango da aurki, azken orduko eragozpenik egon ezean. Hala, termino berdina erabiliko dute, euskaraz zein gazteleraz. Euskararen kasuan, Aiaraldeko Kuadrilla izatera pasako da. Gazteleraren kasuan, aldaketa are nabarmenagoa izango da, Cuadrilla de Ayala izatetik, Cuadrilla de Aiaraldea izatera igaroko baita, euskarazko terminoa mantenduta.
Joan den martxoaren 7an egindako bilkuran erabaki zuen Aiarako Kuadrillako Batzarrak eskualdea kudeatzen duen erakundeari izena aldatzea, eta gaurtik aurrera hogeita hamar egun baliodunetako epea egongo da interesdunek egoki jotzen dituzten erreklamazio, eragozpen edo oharrak aurkeztu ahal izateko, Arabako Aldizkari Ofizialak gaur argitaratu baitu kuadrillaren erabakia.
Arabako Errioaren kasuan ere, aldaketa bidean da, Guardia-Arabako Errioxako Kuadrilla izendapenetik herri harresidunaren izena kentzeko prozesu administratiboa abian delako.
