Hiru hilabeteko elkarrizketen ostean, aurrekontuetarako akordioa lortu dute Laudion EH Bilduk eta Omniak. Hala jakinarazi dute bi alderdiek ohar batean, aurrekontuaren zehaztasunak eman ez badituzte ere; hurrengo egunetan emango dute adostutakoaren berri.
Legegintzaldia udaleko gobernu talde modura hasi zuten bi alderdiek; Omniaren babesa izan zuen EH Bilduko Ainize Gastakak alkate izateko, eta elkarrekin osatu zuten gobernua, 2024ko ekainean talde independenteak gobernua uztea erabaki zuen arte. Politika "eredu desberdinak" zirela argudiatuta alde batera geratzea erabaki zuen Omniak, baina elkarlanean aritzeko asmoa agertu zuen.
