Guardia Zibilak euskal presoen ongietorrien aurkako operazioa egin du gaur goizean, eta bi preso ohi atxilotu ditu ustez ekitaldi horien antolakuntzan parte hartzeagatik. Felipe Pipe San Epifanio Bilbon atxilotu dute, baina Amurrioko bizilaguna da duela hilabete batzuetatik hona; 2017an gelditu zen aske, ETAko kide izatea leporatuta 23 urte espetxean igaro ostean. Karlos Kai Saez de Egilaz, berriz, Basaurin atxilotu egin dute.
Atxiloketak Auzitegi Nazionaleko 6. instrukzio epaitegiaren aginduz egin dituzte, "terrorismoa goratzea" eta "biktimak iraintzea" egotzita. 2020ko urtarrilean burututako Kabat operazioaren jarraipen gisa egin dira atxiloketak; operazio hartan, Oihana San Vicente arabarrarekin batera, Jose Antonio Lopez Ruiz Kubati, Oihana Garmendia eta Haimar Altuna eraman zituzten, ongietorriak antolatzea leporatuta.
Bi atxilotuak libre daude dagoeneko. Saez de Egilaz 13:30ak aldera gelditu da aske, Guardia Zibilaren Intxaurrondoko kuarteletik igaro ostean. San Epifanio ere eguerdian zehar askatu dute.
Elkarretaratzea Amurrion
Sare Herritarrak "lekuz kanpoko ikuskizuntzat" jo duen operazioa salatu du, "iraganera eramaten gaituela" deitoratuz. "Ezin da delitu bihurtu zigorra osorik bete duen pertsona baten askatasunak senide eta lagunen artean sor dezakeen poza", gaineratu du Sarek.
Atxilotuen askatasuna aldarrikatzeko mobilizazioak deitu dituzte Euskal Herriko hainbat herritan, Bakea eta demokrazia. Atxilotuak askatu! lelopean. Amurrion ere, San Epifanioren bizilekuan, elkarretaratzea egingo dute gaur, asteazkena, 19:30ean Juan de Urrutia plazan.
Kai Saez de Egilaz eta Pipe San Epifanio kideak atxilotu du Guardia Zibilak.
— SORTU #LehenikHerria #PrimeroLaGente (@sortuEH) June 30, 2021
Espainiar Estatuko estolderiak askapen prozesua baldintzatzeko ahaleginean jarraitzen du baina ez gaituzte geldituko!
Aski da!#atxilotuakaskatu#BakeaEtaDemokrazia #askatasuna pic.twitter.com/PShU1mmpKt