Aiaraldea, Gorbeialdea eta Añana zeharkatuko ditu Itzuliaren hirugarren etapak

Itzuliaren hirugarren etapa Aiaraldera iristeak Laudio eta Amurrio arteko trafikoa baldintzatuko du egun osoan zehar. 13:00etan Amurrioko Elexondo kaletik irtengo da lasterketa, eta, beraz, ezingo da aparkatu honako lekuetan: Araba kalean, Elexondotik elizako biribilgunera; elizako aparkalekuan; Armurubenta kalean, Elexondotik Felix Murgara; eta Goikolarra plazan.

Ordu horretan, txirrindulariek ibilbide neutralizatua jarraituko dute Amurrioko herrigunetik, irteera egin aurretik: Landaburu, San Jose biribilgunea, Zabaleko, Arenalde, Goikolarra, Mendiko, olibondoaren biribilgunea, Felix Murga, epaitegiko biribilgunea, elizako biribilgunea, Bañuetaibar eta Ugarteko biribilgunea zeharkatuko dituzte.

167 kilometroko etapa publikorik gabe garatuko da, eta 16:30ak aldera iritsiko da Laudiora. Aurretik, Gorbeialdeko, Añanako eta Aiaraldeko hainbat udalerri eta mendate zeharkatuko ditu. Sagasti kale osoan eta Ugarte plazan aparkatzea debekatuta egongo da 8:00etatik aurrera. Butron kaleko aparkalekuan ere ezingo da aparkatu, ezta Lamuza kalean ere, Granjabide kaleko 1 eta 2 zenbakien parean; ezta Goienurin ere, Ugarteko elizatik karabanen aparkalekuraino.

Gainera, Larrazabal, Landaluze, Lamuza, Ugarte, Goienuri eta inguruko kale guztietako bizilagunek aldez aurretik atera behar dituzte ibilgailuak, 16:30etik 17:30era bitartean erabiltzeko asmoa badute.

Eragozpenak autobus zerbitzuetan

Itzuliaren hirugarren etaparen ibilbidea dela eta, Arabako Foru Aldundiaren autobus zerbitzuko hainbat linea bertan behera geldituko dira:

• 11:45 Gasteiz-Laudio
• 12:45 Laudio-Gasteiz
• 16:30 Gasteiz-Laudio
• 16:30 Laudio-Gasteiz
• 16:15 Artziniega-Okondo
• 16:20 Okondo-Llodio
• 17:10 Okondo-Llodio
• 17:30 Llodio-Okondo
• 17:50 Okondo-Artziniega

Lau mendate

Primoz Roglic da sailkapen nagusiko burua, eta tropelak lau mendateri aurre egin beharko die gaurko jardunaldian: hirugarren mailako bi, Altube eta Tejera; eta, azken zatian, bigarren mailako bi, Malkuartu eta Ermualde. Astana Pro Team taldeko Alex Aranburu euskal txirrindularia bigarren postuan dago, astearteko etapan garaipena lortu ondoren; ezustekoa emateko aukera izango du gaur.