Otsailaren 15ean abiatutako greba mugagabearen ostean, 136 kaleratze —hasieran 150 ziren— gauzatuko dituen EEE bat eta langile guztientzako ABLEE bat —martxoaren 29tik irailaren 10era bitartean—. Horiek dira Tubacexeko zuzendaritzak mahai gainean utzi dituen proposamen bakarrak. Negoziazio gogorrak, eguneroko piketeak eta Aiaraldeko eskualde osoa Tubacexeko langileen alboan. Baina ez da akordiorik lortu.
Atzo, asteartean, langileen batzordeak bukatutzat eman zuen negoziazioa, zuzendaritza kaleratzeei uko egiteko prest ez dagoelako.
Greba hasi zenetik egunero bezala, goizeko lehen orduan piketeak izan dira gaur Laudioko fabrikaren aurrean. Langileek eserialdia egin dute sarreran, eta zuzendaritzaren zein langile greba-hausleen autobusek ez dute lortu lantegian sartzea.
Azken bilera, Bilbon
10:30ean, zuzendaritzaren eta sindikatuen arteko negoziazioen azken bilera egitekoa zen. Azkenean, zuzendaritzak Bilbora mugitu du bilera, eta 11:30ean hasi da, NH Villa de Bilbao hotelean.
Sindikatuek eta Aiaraldeko Greba Batzordeak 11:30etik aurrera Bilboko Jesusen Bihotzean mobilizatzeko deia egin diete herritarrei. Ertzaintzak enpresa batzordeko zenbait kide miatu ditu bileran sartzen ari zirenean, eta, bitartean, hainbat pertsona protesta egiten geratu dira eraikinaren kanpoaldean.
Arratsaldean, espero zen bezala, akordiorik gabe amaitu da bilera. Hotelaren barrutik, enpresa batzordeko kideek bideo bat grabatu dute bileraren amaieraren berri emateko: bukatutzat eman dituzte negoziazioak, eta bihar borrokan jarraitzeko deia berretsi dute. Gainera, litekeena da enpresak alde bakarrez hartutako erabakiak epaitegietan amaitzea.
Erabaki berriak hartu aurretik, langileek asanblada bat egingo dute ostegunean, negoziazioen xehetasunak elkarbanatzeko.
???? Akordiorik gabe amaitu dira negoziazioak Tubacexen ➡️ https://t.co/k0pR3pgtsQ
— Arabako ALEA (@ArabakoALEA) March 10, 2021
???? Zuzendaritzak 136 langile utziko ditu kalean, baina sindikatuek borrokan jarraitzeko asmoa berretsi dute, kaleratzerik egon ez dadin.
????️ Bideoa: @Aiaraldea pic.twitter.com/OHi415Q8Zb
AIARALDEA hedabideak negoziazioen azken egunaren zuzeneko kontaketa egin du HEMEN.
136 kaleratze
Hasieran, Tubacexeko zuzendaritzak 150 kaleratze iragarri zituen gaur egun 800 bat langile dituzten Laudio eta Amurrioko lantegietan. Joan den astean, kaleratze kopurua 136ra jaistea proposatu zuen zuzendaritzak.
Orain arte, sindikatuek uko egin diote kaleratzeak barne hartzen dituen edozein planteamenduri; horretarako, aurre-erretiroak bezalako "neurri ez-traumatikoak" planteatu dituzte, enpresaren "egoera koiunturalari" aurre egiteko. Gainera, erakundeen inplikazioa exijitu dute, kaleratzeak geldiarazteko.
Astearteko bileran ezagutu da 22 pertsonak aurre-erretiroak eta pizgarridun bajak onartu dituztela, negoziazioetan zuzendaritzak proposatuta: horietako 12 aurre-erretiroak izango dira, beste 10 pizgarridun bajak eta gainerako 114ak nahitaezko kaleratzeak. Zuzendaritzak hilaren 15era arte luzatu du plan horiei heltzeko epea.
