Ostegun eta ostiral honetan 24 orduko lanuzteak egingo dituzte Tubacexeko langileek, eta 18:00etan mobilizazio bat egingo dute Laudioko lantegitik abiatuta. Protesta zikloari jarraipena emango diote astelehenean, hilaren 15ean, abiatuko duten greba mugagabearekin.
Negoziazio mahaiaren lehen bilera egin zen otsailaren 8an, astelehenean, eta aurreratu zuena baieztatu zien Tubacex enpresako zuzendaritzak langileen ordezkariei: alde batetik, enplegua erregulatzeko espediente bat (EEE) berehala aurkeztuko duela, 150 lanpostu behin betiko ezabatuz.
Horrez gain, plantilla osoari eragingo dion aldi baterako lan-erregulazioko espediente berri bat martxan jarriko du (ABLEE), orain arteko hirugarrena, otsailaren 7an amaitutakoari jarraipena emateko. Espediente hori martxoaren 29tik irailaren 10era bitartean izango da indarrean.
Tubacex en huelga pic.twitter.com/JskIuMplVT
— Baserri (@Baserri2) February 11, 2021
#Tubacex enpresako 150 langileren kaleratzearen aurka milaka atera dira kalera Laudion. Herriko komertzio gehienek mobilizazioarekin bat egiteko saltokiak itxi dituzte 18:00etan. Astelehenean hasiko dute greba mugagabea beharginek pic.twitter.com/s8lsC00PwD
— Izar Mendiguren Cosgaya (@itzulipurdika) February 11, 2021
Plantillaren %20
Uztailean, Tubacex taldeko zuzendaritzak iragarri zuen gastuak doitu behar zituela, eta, horretarako, beharrezkotzat jo zuen plantillaren %20 inguru murriztea. Gaur egun, guztira, 2.500 langile baino gehiago daude talde osoan, eta 800 inguru Aiaraldeko lantegietan, Amurrion eta Laudion.
Uztaileko iragarpenaren ostean, langileen mobilizazio zein lanuzte ugari eta emaitzarik gabeko negoziazioak izan dira. Urte amaieran, gainera, 13 milioi euroko galerak zituela iragarri zituen enpresak, 236,9 milioi euroko likidezia duela onartu zuen arren; hau da, 2024ra arteko maileguei aurre egiteko nahikoa.
Greba mugagabea
Enpresa batzordeko bozeramaileek albistea "oso txarra" dela adierazi eta langileen "erantzuna sendoa" izango dela iragarri dute. Lehen urratsa 24 orduko lanuzteak izango dira, ostegun honetan eta ostiralean. Halaber, greba iraunkorrera jotzeko aukera aztertu ostean, astelehenetik aurrera greba mugagabea abiatuko dutela baieztatu du enpresa batzordeak.
Sindikatuen ustez, enpresak bizi duen krisia "koiunturala" da, batez ere pandemiak eta eskaeren jaitsierak eraginda. Hortaz, "neurri traumatikoak" baztertu eta aldi baterako neurrien alde egiten dute.