Astelehen honetan, Tubacex enpresako zuzendaritzak negoziazio prozesu bat eta bi neurri berri jakinarazi die sindikatuei: alde batetik, enplegua erregulatzeko espediente bat (EEE) berehala aurkeztuko duela, lanpostu ugari behin betiko ezabatuz; bestalde, aldi baterako lan-erregulazioko espediente berri bat (ABLEE), orain arteko hirugarrena, otsailaren 7an amaituko denari jarraipena emateko.
Oraingoz, sindikatuek ez dute xehetasun gehiagorik jaso, baina negoziazio mahaiaren lehen bilera datorren astean egingo da. Hala ere, Amurrioko eta Laudioko lantegietan 150 bat kaleratze gerta litezke, enpresak azken hilabeteetan egindako iragarpenak eta aurreikuspenak betez gero.
Izan ere, uztailean, Tubacex taldeko zuzendaritzak iragarri zuen gastuak doitu behar zituela, eta, horretarako, beharrezkotzat jo zuen plantillaren %20 inguru murriztea. Gaur egun, guztira, 2.500 langile baino gehiago daude talde osoan, eta 800 inguru Aiaraldeko lantegietan, Amurrion eta Laudion.
Uztaileko iragarpenaren ostean, langileen mobilizazio zein lanuzte ugari eta emaitzarik gabeko negoziazioak izan dira. Urte amaieran, gainera, 13 milioi euroko galerak zituela iragarri zituen enpresak, 236,9 milioi euroko likidezia duela onartu zuen arren; hau da, 2024ra arteko maileguei aurre egiteko nahikoa.
Sindikatuen erreakzioa
ELA sindikatuak ohar bat plazaratu du zuzendaritzaren asmoa arbuiatuz. Oharrean, erakundeen inplikazioa eta "Europako funtsak lanpostuak mantentzen laguntzeko erabiltzea" eskatu du ELAk. Gainera, gogorarazi du 2020an aldi baterako 150 langile inguru kaleratu dituztela jada.