Tubacexeko langileen batzorde osoak deituta, 24 orduko lanuztea egin dute ostegun honetan Aiaraldean, enpresaren hiru lantegietan. ELA sindikatuak "oso positibotzat" jo du langileen erantzuna, eta jarraipena "erabatekoa" izan dela azaldu du.
Zuzendaritzak uztailean iragarri zuen gastua 10 milioi euro murrizteko asmoa duela eskualdeko lantegietan, eta horrek 150 lanpostu suntsitzea ekar lezake Aiaraldean. Berregituratze-planaren arabera, nazioarteko plantilla osoaren %20 inguru kaleratu nahi dute, guztira 500 langile, gutxi gorabehera. Gaur egun, 800 langile ditu Tubacexek Araban, Laudioko eta Amurrioko lantegietan.
15:00etan, Amurriotik Laudiora martxa egin dute, eta, lanuzte egunari amaiera emateko, manifestazio bat abiatu da 19:00etan Laudioko Tubacexetik Herriko Plazaraino.
Aiaraldea Komunikabidea greba egunaren zuzeneko jarraipen berezia egiten ari da.
Amurriotik abiatu dira Tubacex taldeko langileak, ekoizpena guztiz geldituta https://t.co/rO6MZaWSKu
— Aiaraldea.eus (@aiaraldea) September 17, 2020
Hasi da manifestazioa, milaka lagun #Tubacex eko langileen alde pic.twitter.com/m0GaJSDkAw
— Aiaraldea.eus (@aiaraldea) September 17, 2020
Txistu eta protesta andana, #Tubacex eko fabrika nagusiaren aurrean. Bost minuturen faltan, gainezka dago errepidea pic.twitter.com/57hpJMfgOn
— Aiaraldea.eus (@aiaraldea) September 17, 2020
Horrenbestez, Luiaondorako bidea hartu du ekimenak #Tubacex pic.twitter.com/3VtWCw2t36
— Aiaraldea.eus (@aiaraldea) September 17, 2020
Tubos Reunidos #Tubacex en lantegiko beharginak ere gehitu dira mobilizaziora. Txalo artean hartu dituzte manifestariak pic.twitter.com/ErCO8MLIjC
— Aiaraldea.eus (@aiaraldea) September 17, 2020
Amurrioko Juan Urrutian txaloak eta lapiko zaratak, #Tubacex eko kaleratzeen aurka: pic.twitter.com/fJfWAhBnI2
— Aiaraldea.eus (@aiaraldea) September 17, 2020
Sindikatuak murrizketen aurka
ELA sindikatuaren ustez, enpresaren jarrera "nahasia eta xantaiatsua" da: "Uztailean plantak lehiakorrak ez zirela eta irtenbidea 150 pertsona kaleratzea zela esaten zuen bitartean, orain kaleratzeen alternatiba gisa langile guztien soldata nabarmen murriztea proposatzen du: plusak kentzea, soldatak izoztea, lanaldia nabarmen handitzea eta onura sozialak murriztea".
Langileen ordezkarien ustez, "beldurraren eta segurtasun ezaren aukera" erabiltzen ari da enpresa, "langileak beldurtzeko eta eskubideen murrizketa bortitza onartzeko".
"Egoera aprobetxatu nahi dute duela urte eta erdi sinatu genuen hitzarmena hausteko, baina ez dugu onartuko", adierazi dute langileek. Gaur gaurkoz, batzorde osoak baztertu du enpresaren planteamendua, euren ustez taldearen eta euskal lantegien benetako egoera ekonomikoa ez dagoelako egiaztatuta. Horregatik, "etorkizunerako plan bat" eskatu diote zuzendaritzari, "lehiakortasuna ezin delako lan kostuetan oinarritu".
