Darabagu: ezohiko Araba Euskaraz jaialdiaren bideoklipa

Arabako ikastolen jaia atzeratu behar izan dute osasun krisiaren ondorioz. Aresketa ikastolak antolatu du aurtengo edizioa, eta urriaren 18an ospatuko da, Amurrion. Darabagu bideoklipa aurkeztu dute asteburu honetan.

Aresketa Ikastolak ekitaldia egin du igande goizean, Amurrioko Guk parkean; izan ere, ekainaren 14an ospatzekoa zen jaialdia, baina aurtengo edizioa urriaren 18an izango da azkenean. Abestia eta bideoklipa aurkeztu dituzte bertan.

Araba Euskaraz honen leloa Darabagu da, eta baita abestiaren izenburua ere. Egoitz Uriarte, Enric Gomez, Dani Lamperez, Victor Sanchez eta Igon Olaguenaga izan dira musikaren sortzaileak; ahotsak, Sabin Guaresti, Aiala Mendieta, Maria Amolategi, Xabi Solano, Iñaki Otxandorena Moro eta Aresketa ikastolako ikasleen eskutik.

Juanjo Respaldizak, Iñaki Otxandorena Morok eta Igon Olaguenagak letra jarri diote; Olaguenagaren esku gelditu da, halaber, konposizioa eta ekoizpena. Victor Sanchez ibili da teknikari lanetan, eta koreografiari dagokionez, Andere Morillo, Ainhize Solaun Mendiguren eta Gorka Blazquez aritu dira.

Aurkezpen ekitaldiaren edukiera mugatua izan da, segurtasun eta osasun irizpideak bermatzeko. Youtubeko kanalean streaming bidezko emisioa egin dute, eta Porrotxek, Koldo Tellitu Ikastolen Elkarteko lehendakariak eta abestiaren sortzaileek hartu dute hitza, besteak beste.

Erlazionatuak

2020ko Araba Euskaraz urriaren 18an ospatuko da

Aiaraldea Amurrio

Ikastolen Elkarteak gaur iragarri du ikastolen aldeko jai guztiak udazkenean egingo direla, Nafarroa Oinez izan ezik. Araba Euskaraz urriaren 18an ...

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide