Elkarretaratzean elkartasuna eta babesa adierazi dizkiete hildako beharginaren senide eta lagunei. Mobilizazioaren amaieran, Santurtziko ontziolan astearte arratsaldean jazotako lan heriotza izan dute gogoan.
Urteko hamaikagarren lan heriotza
Ezbeharra otsailaren 3ko arratsaldeko hirurak pasata gertatu zen Galdakaoko GHI Hornos Industriales enpresan. Osalan Laneko Segurtasun eta Osasunerako Euskal Erakundeak jakinarazi duenez, langilea bere lanaldia betetzen ari zela, pieza bat gainera erori zitzaion eta momentuan bertan zendu zen jasandako zaurien eraginez.
Zerbitzu medikuak bertaratu zirenerako, heriotza baieztatzea besterik ezin izan zuten egin. Istripuaren arrazoiak argitzeko azterketa lanak abiatu dituzte geroztik.
2020an Euskal Herrian ematen den hamaikagarren lan heriotza izan da Laudiokoa, LAB sindikatuaren arabera. Hala, atzo Santurtzin gertatutakoa hamabigarrena izango litzateke.