Laudioko hiltegia "aste gutxiren buruan" berriz zabaltzeko lehen urratsa egin dute Eusko Jaurlaritzak eta Laudioko Udalak. Herriko alkate Ander Añibarrok adierazi duenez, urtea amaitu baino lehen irekiko dute, behin azpiegitura berritzeko egin behar dituzten obrak adostu eta gero.
Añibarrok azaldu duenez, eraberritze integrala egingo dute; besteak beste, hilketa gela egokituko dute, sortzen diren hondakinak kudeatu ahal izateko. Halaber, hobi septiko bat eraikiko dute eta elektrizitate sarea goitik behera konponduko dute.
Hurrengo asteetan proiektuaren xehetasun guztiak publiko egingo dituzte administrazioek, eta obrak zer aurrekontua izango duen argituko da. Gero etorriko da hiltegia kudeatzeari buruzko eztabaida.
