EH Bilduk lehen aldiz irabaziko ditu Eusko Legebiltzarrerako hauteskundeak, 28-29 eserleku eskuratuta. Hala jaso du asteburuan argitaratutako EITB Focus inkestak. CIS Espainiako Ikerketa Soziologikoen Zentroak emaitza bera iragarri du aste honetan bertan kaleratutako beste inkesta batean. EITBren inkestak dioenez, EAJk baino 2-3 eserleku gehiago lortuko ditu koalizioak, nahiz eta boto kopuru antzekoa bereganatu.
Hala, koalizio subiranistak 28-29 eserleku izango lituzke, eta EAJk 26-27 (botoen %34,9 eta %34,2 lortuko lituzkete, hurrenez hurren). Atzetik, hamar edo hamabi legebiltzarkide izango lituzke PSE-EEk (botoen %14), zazpi PPk (%7,7) eta bat edo bi Sumarrek (%3,8). Ez lukete ordezkaritzarik lortuko Elkarrekin Podemosek (%2,4) eta Voxek (%1,5).
Lehen aldiz, Araban
EH Bildu lehen aldiz izango da indar bozkatuena Araban apirilaren 21eko hauteskundeetan. EITB Focusen arabera, hiru eserleku gehiago jaso, eta bederatzi ordezkari izango ditu, botoen %33,4 eskuratuta. EAJ sei puntura izango du, boto-portzentajeari dagokionez. Jeltzaleek botoen %27,6 eta zortzi ordezkari eskuratuko dituzte. Elkarrekin Podemosek eta Sumarrek ez dute ordezkaritzarik lortuko herrialdean, eta Vox ordezkaririk gabe geratuko da.