Irailaren 22an Ikasbidea Ikastolan gertatutakoak soka luzea ekarri du. Joan den astean, gainera, arazoa errepikatu zen berriz ere, eta atzera bota behar izan baitzituzten egoera txarrean zeuden babarrunak; egun horretan, jantokira joan ziren ikasleak bigarren platerik gabe geratu ziren.
Egoera ikusita, eta zabalik dagoen espedientea kontuan hartuta, Eusko Jaurlaritzako bozeramaile Bingen Zupiriak astearte honetan iragarri du Hezkuntza Sailak Serunion enpresarekin duen kontratua bertan behera utziko duela, eta horretarako aukera juridikoak aztertzen ari direla.
Hala ere, Zupiriak argitu duenez, erabakiak soilik janariaren egoera txarra salatu duten bi ikastetxe publikoei eragingo lieke; hau da, Ikasbidea Ikastolako (Dura, Arratzua-Ubarrundia) eta Langile Ikastola Herri Ikastetxeko (Hernani, Gipuzkoa) zerbitzua etengo litzateke, baina ez beste ikastetxetakoa.
"Erabakia lote horiekin lotuta egon behar da; ez esleitutako lote guztiekin", adierazi du sailburuak. "Ondo argudiatutako oinarri juridiko bat egon behar da, eta, gainera, ahalik eta azkarren egin ahal izan behar da. Hezkuntza Sailak eta familiek dute interesik handiena zerbitzua kalitatezkoa izan dadin", azpimarratu du sailburuak, zerbitzuaren "azterketa etengabea" egiten ari direla azalduz.
Murgia eta Zigoitia, lote berean
Zenbait hedabidek argitaratu dutenez, egoitza eta sukalde nagusia Logroñon dituen Serunion enpresak Ikasbideari eskainitako janari sorta beste bi eskolatara iristen da egunero: Murgia BHI (Zuia) eta Gorbeia Eskola HLHI (Zigoitia) ikastetxeetara, hain zuzen ere. Gaur egun, enpresak Arabako herrietako hamaika ikastetxetara eramaten du janaria. Beraz, kontratua etengo balitz, hiru ikastetxe horietan zerbitzua emateari utziko lioke Serunionek, baina beste zortzirekin lanean jarraituko luke.
