Trebiñuk Arabarekin batera egingo du deseskalatze prozesua

Trebiñuren eskaera jaso da EAJk Gobernuarekin erdietsitako akordioan. / PHOT.OK

Espainiako Kongresuak alarma egoera berriro luzatzea onartuko du gaur, Gobernuak EAJrekin lortutako akordioari esker; ondorioz, Trebiñuk Arabako gainontzeko eskualdeen baldintza berdinetan egingo du deseskalatzea.

Azken orduetan EAJk Espainiako Gobernuarekin erdietsitako akordioak hiru ondorio nagusi izango ditu Araban: alarma egoera maiatzaren 24ra arte luzatuko da oraingoz, hauteskunde autonomikoak uztailean egin ahal izango dira eta Trebiñuk Arabarekin batera egingo du deseskalatze prozesua.

Duela egun batzuk, Argantzongo eta Trebiñuko Konderriko alkateek zentzuz jokatzeko eta konfinamendua Araban arintzea eskatu zuten, mugikortasunean arazoak ekiditeko. Aldarrikapena jaso du akordioak, eta EAJren arabera, horrek "zerbitzu onenak eta arreta gertukoena" bermatuko ditu Trebiñun.

Alderdiek gaur bozkatuko dute Espainiako Kongresuan alarma egoera beste hamabost egun luzatzearen inguruan. EAJk atzo aurkeztutako baldintzak onartu ditu Espainiako Gobernuak; hortaz, jeltzaleen baiezkoarekin, alarma egoera berriro luzatzea onartuko dela aurreikusten da, aipatutako baldintzekin, besteak beste.

Trukean, Espainiako Gobernuak onartu du alarma egoeraren kudeaketa autonomia erkidego bakoitzarekin adostea; EAEaren kasuan, deseskalatze-neurriak Eusko Jaurlaritzarekin adostuko dira, eta Iñigo Urkullu lehendakariak aplikatuko lituzke.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide