Hilabete batzuk daramatza Trebiñuko Udalak bertako natura ezagutarazteko txangoak antolatzen; igande honetan beste bat egingo dute, Trebiñuko pinudietara: "Trebiñuko Konderriak badu, ekialdeko muturrean, pinudi eremua ere bai. Aspaldi landatutako pinuak dira. Gure Finlandia txikia da, baso ezberdina eta xarmaz betea, Izkiko mendien ertzean. Basogintza eta kultura ikuspegitik begiratuz gero, oso txoko interesgarria da". Ibilaldiaren bitartez inguruneari buruz ikasteko aukera izango dute parte hartzen dutenek, landareak, animaliak, etnografia, edo toponimiaren inguruan.
Irteera 9:30ean da, Baxauriko iturritik, eta buelta 14:00etan egingo dute. Txangoan parte hartzeko gutxieneko adina 12 urtekoa da, eta prezioa bi euro, 14 urtetik behera doan. Izena emateko Trebiñuko Konderriko udalera deitu behar da.