Lehen urratsak egiten hasi da 2018ko Araba Euskaraz

Korrikako materiala salgai jarri dute Argantzon Ikastolan. ALEA

'Irrikitan' da datorren urteko ekainaren 17an Argantzunen ospatuko den jaiaren leloa.

2018ko Araba Euskaraz jaiaren aurkezpen ofiziala egingo dute hurrengo asteartean, hilaren 28an,  Gasteizen. Halaber, abenduaren 1ean, Argantzunen bertan, ikuskizun berezi bat antolatu dute jaiaren prestaketari buruzko zehaztasunak herritarrei emateko.

Ekainaren 17an ospatuko da jaia, Argantzon Ikastola laguntzeko asmoarekin. Eta dagoeneko Argantzon Ikastolan materialaren salmentarekin hasi dira. Hala, astelehenero, 15:00etatik 17:30ak arte Araba Euskarazeko denda zabalik dago ikastolan bertan. Halaber, iragan urrian Izarrako azokan egin zuten bezala, hurrengo hilabeteetan Arabako hainbat txokotara hurbilduko dira trebiñarrak  materiala banatzeko asmoarekin. 

Leloa aukeratu dute

Irrikitan izango da 2018an Euskal Herriko ikastolen federazioen jaiak izango duen lelo nagusia: "Berdintasunean gozatzeko, mugak gainditzeko, bidea egiteko, ikasten jarraitzeko irrikitan".

Arabako ikastola txikiena da Argantzon eta duela hamahiru urte ireki zuen guraso talde batek. Haur Hezkuntza eskaini du orain arte, baina Lehen Hezkuntza ere emateko asmoa du. Horretarako alboko Manzanos herrian irekiko dituzte gela berriak. Eusko Jaurlaritzaren Hezkuntza sailaren baimenaren zain daude egitasmoa behar bezala martxan jartzeko. 

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide