Asteburu berezia dute aurretik Baxaurin, mikologia jardunaldiak egingo dituzte eta larunbatean, azaroak 4. Aurtengo edizioa, gainera, ez da aurrekoak bezalakoa izango, 25 urte beteko dira horiek lehen aldiz egin zenetik. Alfredo Mendozak gogorarazi du herritar talde bat "bere kabuz" hasi zela eguna antolatzen: "Herriko nagusiek zizez hitz egiten zuten garai hartan, eta gainerakoen ez jakintasunari aurre egitea pentsatu genuen; lehenengo bakarrik egiten hasi ginen, eta gero, adituen laguntzarekin. Asko ikasi dugu urteotan", esan du.
Ohikoa den moduan, inguruko basoetara abiatuko dira lehenengo perretxiko bila. Taldeka banatuko dira: batzuk, pagadira joaten diren bitartean, beste batzuk, pinudira eta hariztira hurbilduko dira. Eguerdian, herrian elkartuko dira eta Aranzadiko Jose Manuel Lekuona eta Juan Ignacio Lopez mikologoek aurkitutako zizak sailkatuko dituzte. Aurten ere, espezie gutxi topatuko dituztela uste du Mendozak, eta erakusketa "eskas" geratuko denez, pantaila bidez, beste hainbat perretxikoen gaineko informazioa egongo da ikusgai.
Jangarriak direnak ahora
Herri bazkaririk ez da faltako; betiko moduan, basoan jasotako eta jatekoak diren perretxikoekin hainbat plater prestatuko dituzte, besteak beste. Bazkalostean, erakusketan argitu barik geratu diren zalantzei erantzuna emango diete mikologoek.