Hilaren 21ean Ilargia Behatzeko Nazioarteko Eguna izango dela abiapuntutzat hartuta, Araban dauden bi elkarte astronomikoek behaketa hitzordu bana antolatu dute.
Gasteizen, behaketa Atarian izango da, Arabako Astronomia Elkartearen eskutik. 20:00etan hasi eta 23:00ak arte luzatuko dute topaketa. Bertan aditu batek Ilargiaren orografiari eta bere egiturei buruz irakatsiko die parte hartzaileei.
La Otra Mitad elkarteak, berriz, Izki parketik gertu antolatu du bere behaketa gaua: Santikurutze Kanpezun, Fresnedoko aparkalekuaren behatokian jarri dute hitzordua, 20:00etan. Aurreratu dutenez, Ilargia behatzeaz gain, zeru planisferioaren erabilera azaltzeko ere erabiliko dute parada.
Ez da egunotako behaketa bakarra izango Mendialdean. Izan ere, hilaren 28an Ilargiaren beste behaketa bat antolatu du La Otra Mitadek, oraingoan Korresetik. Dena ondo bidean, ilargi eklipse partziala ikusten saiatuko dira. Aurrekoan ez bezala, ekitaldi honetarako aldez aurretik eman beharko da izena, eta Maeztuko industrialdetik autobus bidez eramango dituzte parte hartzaileak.