Kirol hitzordu berri bat du Arabak 2022tik, Mendialdean: iaz lehen aldiz antolatu zuten Izki Trail mendi lasterketa, Izkiko Parke Naturalean eta inguruko lurretan, Arraia-Maeztu udalerrian. Karrantan-Oskarbi Kultura Elkarteak antolatutako mendi lasterketen Arabako Koparen barruan dago Izki Trail, eta Vital Fundazioaren, Arabako Foru Aldundiaren eta Arraia-Maeztuko Udalaren babesa du.
21 kilometroko distantziarekin (maratoi erdia, %60 bidezidorrean eta %30 pistan), 750 metroko igoera metatuarekin eta bi ordu eta 20 minutu inguruko denbora aurreikuspenarekin, aurten bigarren edizioa egingo dute uztailaren 29an. Kronoak.com webgunearen bitartez izena emateko epea uztailaren 22an amaituko da.
Izki Trail lasterketaren helburuen artean ingurunea eta haren ekosistema balioestea dago. Horregatik, "kontu handiz" diseinatu dute ibilbidea, eta ia osorik Izkiko Parke Naturalean egingo da, naturaren erdian, pagadi eta gaztainondoen artean. Era berean, tokiko ekonomia dinamizatu eta Arraia-Maeztu osatzen duten herriak ezagutarazi nahi dituzte. Izan ere, lortutako irabaziak natura babesteko proiektuetara bideratuko dituzte.
Ibilbidea
Ibilbidearen %90 mendi bidezidorretan barrena joango da aurten ere, eta hiru gailur igoko dira, baina iazko ibilbidea moldatuta: Ipurtika, San Kristobal eta San Justi. Irteera eta helmuga Apilaizko Gerardo Lopez de Gereñu plazan egongo dira, eta lasterketa 09:00etan abiatuko da.
Apilaiztik irten bezain laster, Izki aldera abiatuko dira pistatik, Arregi piezatik, lehenengo gailurrera igotzeko: Ipurtika, balio kalkulaezineko pagadiak zeharkatuz. Presan behera jaitsi, eta gaztainondoen eremutik gora joko dute (Europako funtsen laguntzaz arreta handiz tratatzen ari dira gune hori, eta hazi-banku bat aurkituko dugu bertan) eskalada maite dutenen paradisura, Apellanizko haitzetara. Jarraian, San Kristobal gailurrera igoko dira, eta Postariaren Bide famatutik jaitsi.
Izki Parke Naturalaren ikuspegi ikusgarria duen lursail oso azkar batetik aurrera eginez, lasterketaren azken gailurreraino iritsiko gara: San Justi. Berriro ere Apilaizera joko dute, mendi-mazela osoan zehar eta Txarabitana bidezidorraren ikuspegi ikusgarrietan barrena, pagadien azken zatiari Hagako Iturritik aurre egin arte, Gerardo Lopez de Guereñu plazara iritsi arte.
Lasterketaren inguruko informazio guztia Izki Trail webgune ofizialean topa daiteke.
Herri bat martxan
Aurtengo maratoi erdiarekin batera, Herri bat martxan! ekimena antolatu dute, Vital Fundazioak, Aldundiak eta Murgiako LHIIk bultzatutako Herri bat, biodibertsitatearen aldeko ekintza bat programak sustatuta.
Horren barruan, 5 eta 12 urte bitarteko haurrentzako ginkana ekologiko bat (doan) izango da ostiralean, hilaren 28an, 17:30etik 19:30era; eta larunbatean, hilaren 29an, Apilaizko errotara martxa gidatu bat (3 euro) egingo dute, 09:15etik 10:30era, publiko guztiei zuzenduta.
Jarduera batean zein bestean parte hartzeko izena eman behar da, uztailaren 25era arte, Vital Fundazioaren webgunean. Bildutako dirua ELAk eragindako pertsonen eta haien senideen alde borrokatzen duen Arabako ADELA elkartearentzat izango da.