Proiektu eolikoaren aurka agertu da Azazeta, Aixeindarren bisitaren aurrean

Erredakzioa 2022ko abe. 13a, 12:30
Atzoko elkarretaratzea Azazetan. / Argazkia: MENDIAK ASKE

Aixeindarreko ordezkariak Azazetako herritarrekin bildu bitartean, Arabako Mendiak Aske plataformak elkarretaratzea egin du energia enpresak Gasteizko Mendietan eraiki nahi duen zentral eolikoa arbuiatzeko.

Astelehen honetan, Arabako Mendiak Aske plataformak elkarretaratze bat egin du Azazetan, eremu natural horretan proposatutako parke eolikoaren kontra. Izan ere, beste zenbait enpresa Arabako hainbat herritan egiten ari diren bezala, Iberdrolak eta EEEk osatutako Aixeindar sozietate publiko-pribatuaren ordezkariak bertako bizilagunekin bildu dira.

Bisita hori baliatu nahi izan du Mendiak Askek beste behin ere Gasteizko Mendietako proiektu eolikoari errefusa erakusteko, gogoraraziz Azazetako kontzejuak bere gaitzespena adierazi duela eta alegazioak aurkeztu dituela.

"Orain, proiektu bera aurkezten da, zuzenketa puntualen batekin, biodibertsitate anitza hartzen duen ekosistema heldu hori suntsitzeko noraezean jarraituko lukeena", salatu dute. "Proiektu hori ezartzea suntsitzailea izango litzateke bertako bizimoduentzat: basoa, hegazti fauna, kiropteroak..., eta urteko garai desberdinetan babesleku den habitat bat zatituko luke, Europa mailako korridore ekologikoa baita".

"Izkiko Parke Naturalaren, Gasteizko Mendien eta Entzia Mendilerroaren arteko lotura horrek babestu, zaindu eta garatu beharreko naturagune paregabea osatzen du", gaineratu du plataformak, zonaldea bazterketa eremu izatea aldarrikatuz. "Energia berriztagarrien ekoizpenak koherentea izan behar du biodibertsitatearen kontserbazioarekin. Denak ez du balio. Berriztagarriak bai, baina ez horrela".

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide