Kirol hitzordu berri bat izango du Arabak 2022tik aurrera: abuztuaren 27an Izki Trail mendi lasterketaren lehen edizioa antolatuko dute, Izkiko Parke Naturalean eta inguruko lurretan, Arraia-Maeztu udalerrian. Datuetan laburbilduta: 21 kilometroko distantzia, 700 metroko desnibela eta 200 parte-hartzaile inguru izateko aurreikuspena.
Karrantan-Oskarbi Kultura Elkarteak antolatutako mendi lasterketen Arabako Koparen barruan izango da Izki Trail, eta Vital Fundazioaren, Arabako Foru Aldundiaren eta Arraia-Maeztuko Udalaren babesa izango du.
Probaren helburu nagusia Izkiko Parke Naturalaren balioa, ondarea eta ingurunea ezagutaraztea da. Ibilbidea Apilaizko zein inguruetako kokaleku erakargarrienak eta ezagunenak zeharkatzeko diseinatu dute, eta egokia da lasterkari aurreratuenentzat zein publiko orokorrarentzat.
Ibilbidearen %90 mendi bidezidorretan barrena joango da, eta hiru gailur igoko dira: San Kristobal, San Justi eta Ipurtika. Izkiranzko pistatik hasi eta balio ikaragarriko pagadiak zeharkatuko ditu. Eskalada maite dutenen paradisu batetik jarraituko du, Apilaizko haitzetatik, gaztainondo eremuraino. Ondoren, San Kristobal gailurrerantz igo beharko da, Apilaizko presatik eta Carteroaren zidor ospetsutik igaroz. Oso lur bizkor batetik ibilita lauan, Izkiko Parke Naturalaren ikuspegi ikusgarriarekin, lasterketaren bigarren gailurrera iritsiko dira, San Justira. Berriro ere Apilaiz norabidera joko dute, mendi hegal lauan zehar eta bista ikusgarriekin, probako azken igoerari, Ipurtikari, aurre egin arte.
Irteera eta helmuga Apilaizko Gerardo Lopez de Gereñu plazan egongo dira, eta lasterketa 10:30ean abiatuko da.
Lasterketaren inguruko informazio guztia Izki Trail webgune ofizialean topa daiteke.