Arabako ibilbide berde erabilienetakoa da Vasco-Navarro trenbide zaharrekoa. 62 kilometro hartzen ditu eta iparraldetik hegoaldera zeharkatzen du lurraldea: Gipuzkoarekiko muga den Arlabango mendatetik abiatuta, Gasteizeraino iristen da, eta handik Lizarrarekin lotzen du lurraldea, Arabako Mendialdea zeharkatuz.
Ekaineko euri erauntsiek —hilaren 16an 50 litro baino gehiago neurtu ziren metro koadroko— ohiz kanpoko ur goraldia eragin zuen Ega-Berron ibaian, kalte handiak eta 30 metroko luizia eraginez Antoñana pareko tartean (Kanpezu).
Aldundiaren Ingurumen eta Hirigintza Sailak haren ordezko igarobidea prestatu behar izan zuen, eta orain ibilbidea lehengoratzeko ia 35.000 euroko aurrekontua erabiliko du: proiektuan, besteak beste, Ega-Berron ibaiaren ertza indartzeko harri lubeta berde bat egitea eta zorua berrezartzea jaso da.
Hilabeteko epean bukatzea aurreikusi dute, eta itxura berritzeaz gain, Vasco-Navarro trenbideko ibilbide berdearen jatorrizko pasabidea seguruago egiteko helburua izango dute lanek.
