Arabako Diputazioak eta Arraia-Maeztuko Udalak Miel Angel Elustondok idatzitako Abdon Gonzalez de Alaizaren Alfabetoa izeneko liburua aurkeztu dute asteburuan. Euskarazko lehen komikiaren sorkuntza zein horren bultzatzaile Abdon Gonzalez de Alaizaren ibilbidea errepasatzen ditu aurkeztutako argitalpen berriak.
1876an jaio zen Musitu herrian Abdon Gonzalez de Alaiza Azazeta, Txistu euskarazko lehen komikiaren bultzatzaile nagusia. Arraia-Maeztuko alkate Anartz Gorrotxategi arduratu da galdutzat zegoen aldizkari hori berreskuratzeaz. Gorrotxategik egindako lanari esker, 1927an argitaratutako zenbaki guztiak daude orain.
Zenbait iturriren arabera, Gonzalez de Alaiza da Txistu lanaren sortzailea. Baina testu horretan jasotako alfabetoa kontuan hartuta, komiki horren egileak ezezaguna izaten jarraitzen du. Dena den, ziur asko Txistu lanak ez zuen argirik ikusiko Musituko herritarrak adorea erakutsi izan ez balu.
16 zenbaki
Gorrotxategik azaldu du orain dela hiru urte horren gainean ikertzen hasi zirenean, zenbaki guztiak galduak zirela uste zutela. Horrekin lotuta, zera azpimarratu du: "Akats hori zuzendu dugu, argitara ekarri baititugu aldizkariaren 16 aleak; irakurri ahal izan ditugu eta ohartu gara denbora igaro dela, mundua aldatu dela, bai eta umorea egiteko eta ulertzeko modua ere, eta garai hartako komiki aldizkariak fosilduta dirauela gaur egun".
Gaineratu du larunbatean aurkeztutako liburua "omenaldi bero bat, aintzatespen bat" dela, "gogo onez" egiten diotena euskal kulturaren alde lan egin zuen Arraia-Maeztuko musituar ospetsu bati, "entzute handikoa izan arren, Araban eta Euskal Herrian ezezaguna zena".
