"Arroila-jaitsiera oso ohikoa bihurtu da Sabando ibaian, eta kalte handia eragiten ari da bertan. Abentura-kiroletako enpresa batzuei baimena ematen zaie ehunka pertsona ibaitik jaisteko, eta horrek eragin larria du ibaiaren egituran, landaredian eta faunan. Eskaera honen bidez, hain masifikatuta dauden baimen horiek bertan behera uztea lortu nahi dugu". Change.org online plataforman jarri du Antoñanako bizilagunen talde batek eskaera, eta ingurune hori eta ur-jauzia babesteko berrehun sinadura lortzeko helburua jarri dute. Dagoeneko 150 baino gehiago lortu dituzte.
Sabando erreka Ega ibaiaren adarra da, Natura 2000 sarearen barruan dago, eta natura-interes handiko tartea da. Errekaren ibilguan dago Aguaque ur-jauzia, Antoñanako lurretan, herritik kilometro gutxira. Bertan, abentura-enpresa ugari aritzen dira, arroila-jaitsieran lehen urratsa egin nahi dutenentzat saioak antolatzen.
Aguaquen kirol jarduera hori mugatzeko sinadura bilketa bultzatu duten herritarrek sare sozialetan azaldu dutenez, dagoen ezinegona aspaldi helarazi zioten Arabako Foru Aldundiari. Bitartean, haien esanetan, "eragin larria" izaten ari da kirol praktika Sabando ibaiaren ingurunean, eta baimenik gabe ere praktikatzen ari dira.
Kanpezuko alkatea Iber Basterrak ALEAri azaldu dionez, asteartean bertan bilduko da Antoñanako Batzar Administratiboarekin arazoa bideratzeko.