Gaur, Aldundiak bi Bonelli arrano txita askatu ditu, Mendialdean. Haietako bat, Granadako Orgiva herriko habia batean jaso da, eta Andaluziako Autonomia Erkidegoak eman du. Bigarrena, berriz, Madrildik dator, eta bertako GREFA zentroan hazia da.
Gaurko ekintza Europako LIFE Bonelli proiektuaren barruan dago kokatuta. Egitasmoaren helburua gainbeheran dagoen espezie hori berpiztea da. "Lan eta lan dihardugu espezie mehatxatu horren egoera hobetzeko, duela lau hamarkadako kopuruetara itzultzeko. Garai haietan baziren, gutxienez, Bonelli arranoak hartutako bost inguru Araban", azaldu du Ingurumen Saileko foru diputatu Josean Galerak.
Espezie mehatxatua
Izan ere, harrapari hori espezie mehatxatua eta lehentasunezkoa da Europan. Europako Bonelli arranoen %80 Iberiar penintsulan daude, eta bertan topatzen dituen mehatxurik handienak linea elektrikoetan elektrokutatzea, habitaten hondatzea eta aldatzea dira. Hiru belaunaldietan, %75 baino gehiago urritu da arrano mota hau. Horregatik, duela zenbait urtetik hona, hura zaintzeko neurriak hasi dira ezartzen.