Emakume gazte bat hil da gaur Albeizen, lehen zantzuen arabera, Araiako tren geltokiko katenaria batek eragindako kalte elektriko baten ondorioz.
Ezbeharra 14:00ak pasata jazo da. Lagun batek larrialdi zerbitzuei jakinarazi die bi emakume gazte zaurituta zeudela tren bagoi baten ondoan, Araiako tren geltokian.
Hara bertaratu dira larrialdietako langileak: Ertzaintzaren patruilak, suhiltzaileak eta osasun langileak. Bertaratutako larrialdi zerbitzuek neskei bizkortzeko maniobrak egin dizkieten arren, gazteetako bat hil egin da azkenean. Beste neska, hainbat lesiorekin, ospitalera eraman dute. Sare elektrikoko tentsioa eten egin dute, bertan arta eman ahal izateko, eta trenbideko trafikoari ere eragin dio neurriak.
Ertzaintzaren arabera, ustez han aparkatuta zegoen tren bagoi batera igo dira gazteak, eta katenaria bateko tentsio elektrikoak harrapatu ditu, baina ezbeharra ikertzen ari dira oraindik.