Euskal Dantzarien Biltzarrak lehen aldiz antolatuko du aurten Euskal Herriko Gazteen Dantza Topaketa, ekainaren 30etik uztailaren 2ra, ostiraletik igandera, Araian (Asparrena). Ekimenean parte hartuko duten gazteek dantza taldeetako belaunaldi aldaketaren inguruko gogoeta egingo dute bertan.
Bi egun baino ez dira falta martxoaren 24an izena emateko epea amaitzeko, eta Euskal Herri osoko 15 eta 25 urte bitarteko 100 dantzari ingururen parte hartzea baieztatu dute antolatzaileek.
"Dantza taldeen belaunaldi erreleborik ezari irtenbidea bilatzea da helburu nagusia. Euskal Dantzarien Biltzarrak gazteen ahalduntzearen aldeko apustua egiten du, taldeen bizitzan parte aktiboa izan dadin. Taldeen etorkizunari begira haien presentziak eta ekintzek duten garrantzia ikusarazi nahi zaie", azaldu du Euskal Dantzarien Biltzarrak.
Hiru egunez, hausnarketarako, dantzarako, harremanetarako, tradiziorako eta berrikuntzarako tartea izango dute, eta partaide bakoitzarentzat "ezinbesteko esperientzia" izango dela ziurtatu dute, baita "dantzaria izateaz harro" egoteko aukera ere.
Euskal Dantzarien Biltzarra 1965ean sortu zen, Euskal Herriko dantza, musika eta ohiturak mantendu, berreskuratu eta zabaltzeko asmoarekin. Irabazi asmorik gabeko elkarte soziokulturala da, euskal dantzak sustatu eta babesteko helburua duena.