Bizilagunek eta Zadorra Bizirik plataformak ohartarazi dutenez, duela egun batzuk gasolio usaina nabaritzen hasi zen Etxabe errekaren inguruan. Horren aurrean, tapakiak jarri dituzte ibaiaren zenbait puntutan, isurketa kontrolatzen saiatzeko, baina ez dute erabat lortu. Zadorra Bizirik-en susmo guztien arabera, isurketa nekazaritza kooperatibaren ondoko gasolindegi batetik dator.
Azken egunetan, isurketa baieztatzeko hainbat argazki atera dituzte, eta astearte honetan plataformak isurketaren berri eman die 112 SOS Deiak zerbitzuari eta URA agentziari. Oraingoz ez da arrainen heriotzarik gertatu, eta isurketaren jatorria ikertzen ari dira une honetan.