Pasta gogorreko artzai gazta kategorian lortu du Asparreneko Olano gaztandegiak lehen saria, Eginoko Artzaia izeneko gaztarekin, Gourmet Quesos Espainiako gazta onenen lehiaketan.
Topaketa ospetsuak bere hamabigarren edizioa egin du, eta bertan estatuko kalitate goreneko gaztak egon dira, Jose Luis Martin gaztagile maisuaren zuzendaritzapean. Partaidetza handia egon da lehiaketan, 800 gazta baino gehiago bildu baitira hitzordura, 15 kategoria desberdinetan.
Olano gaztandegiaren Eginoko Artzaia gaztarekin batera, Lekarozko Kortaria baseriko Infernuko Gasnak erdi ondua eta ketua kategorietan lehen sariak eraman ditu, Olabarriako Aizpea baserriak Aizpea Mendiko Gaztarekin bigarren saria lortu du ketua kategorian, eta Uztegiko Antsoneak bigarren saria lortu du pasta gogorreko artzai gaztan. Saritutako Idiazabal gaztandegien artean, ketua kategorian hirugarren saria eraman du Olaztiko Quesos La Vasco Navarrak-
Artzai Gazta Elkarteko eta Idiazabal Gazta Jatorri Izendapeneko gaztategiak berriz ere munduko gazta onenen artean sarituak izan direla nabarmendu du elkarteak, "bere kalitate gorena ziurtatuz eta gure gaztaren izen ona nazioarte mailan zabalduz".