Aguraingo Udalak azken egunetan argitaratutako bando batean azaldu duenez, azken egunetan izandako euriteen eta desizozteen ondorioz, udalerriko ura ez da egokia kontsumorako. Izan ere, edateko urarentzat gomendatutakoak gainditzen dituzten solido esekien mailak hauteman dituzte hornidurako uretan.
Ernesto Sainz alkateak sinatutako jakinarazpenaren bitartez, iturriko urik ez edatea eskatu die Aguraingo bizilagunei, "beste abisu bat eman arte".
Nolanahi ere, bandoa herenegunekoa da, astelehenekoa, eta azken bi egunetan egoera bideratzeko lanean aritu da Aguraingo Udala. Besteak beste, depositua aldatu dute, iturburutik heltzen den biltegitik hartu beharrean, ura erreserbako beste biltegi batetik hartzeko; gainera, hodiak hustu egin dituzte.
Alkateak azaldu duenez, asteartean egindako azterketen emaitzak aurreko egunekoak baino hobeak izan dira, eta, beraz, oso litekeena da gaur bertan, asteazkenean, gomendioa bertan behera uztea.