Araiako zineman izango da Jaki osasungarriak, gure lurretatik, gure ekoizleengandik jardunaldia; eta bertan Euskal Herrian zehar martxan jarri diren esperientzia desberdinak ezagutzeko aukera izango da. Hartara, Azpeitiko Merkatuko esperientzia eta bertako produktuen vending-makinak, Trapagako gaztetxeko gazteek bokata jasangarriekin egin duten lana, Iruñeko haur-eskoletako hornidura eta menuak… izango dira. Gainera, goiz osoan zehar Gaixotzen gaituen elikaduraren jatorrira bidaia erakusketa izango da ikusgai.
Jardunaldian sarrera doakoa da, baina aldez aurretik izena eman behar da 945 30 12 00 telefonoan (galdetu Arantza edo Ana Perez de Notarioagatik) edo lautadalge@gmail.com helbidean.
Jardunaldiak 10:00etan zabalduko dituzte, Nola hobetu elikadura eskola jantokietan hitzaldiarekin. Ondoren, 10:30ean, Azpeitiko Elikaguneak bere esperientziaren berri emango du; 11:00etan, berriz, Trapagako Gaztetxeko bokata jasangarriak aurkeztuko dituzte; eta 12:00etan Baserritarrak jantoki publikoak hornitzen hitzaldia izango da. Iruñeko Hemengoak ekimenarena izango da azken aurkezpena.