Barrundiako osoko bilkurak astelehen honetan onartu du 2021erako aurrekontua. 2020ko aurrekontuaren antzeko kopurua izango du: 984.069 euro. Aurrekontuaren %3,13 inbertsioetarako izango da, hau da, 30.808 euro.
Toki-erakundeak finantzatzeko funtsaren partida murriztu denez, kreditu gehigarrien bidez hornitzea espero du Udal Gobernuak.
Barrundiako alkate Igor Medina Isasak (EH Bildu) azaldu duenez, aurrekontuen helburua «aparteko egoerari erantzutea izango da, betiere sortu diren beharrei erantzunez eta egin beharreko inbertsioak bermatuz». Diru sarrerak gutxitu diren arren, bestelako baliabideak bilatuko dituzte inbertsio jarduerari, gastu arruntari eta gizartearen premiei eusteko asmoz.
Inbertsio nagusiak
Hainbat inbertsio nabarmendu ditu Barrundiako Udalak: Euskaldun Berri plazan egingo den eraikin berria, herritarren sozializaziorako gunea sortuz (135.800 euro), Herriko plazaren oinarrizko birgaitzea (34.489 euro), eraikin publikoetan energia berriztagarri eta jasangarriak erabiltzeko aukerak aztertu eta gauzatzeko plana (15.000 euro) eta Eskola Txikiaren argiztapena aldatzeko diru partida (4.000 euro); sortu berri den Eskola Txikiko altzairuak erosteko beste 5.000 euro gorde dira.
Hirigintza Antolakuntza Plan Orokorra egiteko beste 267.000 euro aurreikusi ditu udal gobernuak, eta Gainandiko mendi itxiera birgaitzeko beste 8.000 euroko partida jaso du aurrekontuak.
Bestalde, aurreko urteetako zenbait partida mantenduko dituzte: musika eta euskara ikasteko bekak (9.000 euro); Ozaetako Kontsumo Elkarteari laguntza, Ekonomatoaren mantentze lanekin jarraitzeko (6.000 euro), eta, azkenik, hondakin organikoa sustatzeko diru laguntza lerroa egonkortzeko (4.000 euro).