Baheketa masiboa egingo dute Agurainen, Asparrenean eta Donemiliagan

Agurain, airetik ikusita. / AFA-QUINTAS

Osasun Sailak jakinarazi duenez, urtarrilaren 13tik 16ra bitartean, biak barne, PCR proben baheketa masiboa egingo da Aguraingo kiroldegian. Agurain, Asparrena eta Donemiliagako herritar guztiak animatu dituzte proba egitera.

Asteazkenetik larunbatera, 9:00etatik 20:00etara, Aguraingo kiroldegian egingo dira PCR probak. 16 urtetik gorako herritar guztiak joan ahal izango dira, eta ez da beharrezkoa izango aldez aurretik hitzordua eskatzea.

"Herritar guztiak dei honetara joatera animatzen ditut, guztion onerako. Garrantzitsua da hitzordura etortzea; gure eta gure bizilagunen osasunarekin hitzordua da", adierazi du Aguraingo alkate Ernesto Sainzek bere Facebook orrialdean. Halaber, deialdia zabaltzeko laguntza eskatu dute udalek; Asparreneko Udalak, adibidez, bando bat argitaratu du deialdiaren berri emateko.

Konfinamenduaren atarian

Azken egunetan, osasun egoera okertu da Araba osoan, eta bereziki Lautadan. Azken 24 orduetan, 92 positibo berri atzeman dira Araban, eta, une honetan, azken 14 egunetan metatutako intzidentzia tasa 579,11koa da Agurainen, 1423,27koa Asparrenean, eta 964,19koa Donemiliagan.

Positiboen kopuru handia dela eta, hiru udalerri horietako ostalaritzak pertsiana jaitsi behar izan du astearte honetan, eta, ziurrenik, hurrengo egunetan konfinamendu perimetrala ezarriko da hiruretan, egoera hobetu ezean.

Horrekin batera, Osasun Sailak eta Osakidetzak herritar guztiei gogorarazi diete Covid-19arekin bateragarriak diren sintomak badituzte sukarra, eztula, eztarriko mina, arnasa hartzeko zailtasunak edo usaimena galtzea, beren etxeetan bakartzeko eta osasun zentrora deitzeko.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide