Trokonizko Waldorf ikastetxea itxi dute Covid-19aren baheketa egin bitartean

Waldorf pedagogia erabiltzen duen Trokonizko Geroa Eskola. / BURUNDA (Wikiloc)

Eusko Jaurlaritzako Osasun Sailak Trokonizko Waldorf ikastetxeko eskolak bertan behera utzi ditu. PCR proba egin eta emaitza negatiboa dutenak bakarrik sartu ahal izango dira zentroan.

SER irratiak aurreratu duenez, Trokonizen (Iruraitz-Gauna) Waldorf metodologia erabiltzen duen Geroa Eskola aldi baterako ixtea erabaki du Osasun Sailak. Izan ere, azken egunetan, Covid-19ko hainbat kasu susmagarriren arrastoa jarraitzen ari ziren ikastetxe horretako ikasgeletan.

Osasun agintariek baheketa hasi dute eskolan, eta ikastetxeak igande honetan jakinarazi die agindua familiei, barne-zirkular batean: "Gela guztietako jarduera etetea erabaki da, langileen eta ikasleen PCR negatiboak baieztatu arte; baheketan emaitza negatiboa duten langile eta ikasleak bakarrik sar daitezke gelan".

Asteburu honetan zehar baheketa prozesua amaitzeko denbora nahikorik izan ez dutenez, eta eskola jarduerari berrekiteko emaitzen zain egon behar direnez, aurrez aurreko eskola jarduera eten egiten dute momentuz, "berriro abisatu arte". Beraz, PCR proban emaitza negatiboa dutenak baino ezin izango dira eskolara itzuli.

Polemika

SER irratiak jakitera eman duenez, hainbat familiak uko egin diote seme-alabei proba egiteari Osakidetzaren deia jaso dutenean.

Ikasturte hasieran ere polemika piztu zen Geroa Eskolan, Eusko Jaurlaritzak maskararen erabilerari buruzko ikerketa bat abiatu zuenean; izan ere, Jaurlaritzak esku hartu arte maskara borondatezkoa izan zen eskolan.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide