Atxilotuak hainbat dositan banatuta zeraman speeda; horrez gain, doitasun balantza bat ere atzeman zioten ertzainek, eta bere etxea miatu zutenean, droga-hauts gehiago eta pastillak ere aurkitu zituzten.
13:15ak aldera, lanean ari zen patruila batek auto bat geldiarazi zuen, eta gidaria identifikatu zuen. Orduan, poltsa garden txiki batzuk eta telefono mugikor bat ikusi zituzten kopilotuaren eserlekuan; bitartean, telefonoa jo eta jo ari zela azaldu du Segurtasun Sailak.
Gainera, eserlekuaren azpiko konpartimentu batean, substantzia zuri bat gordetzen zuen plastikozko poltsa bat eta doitasun-balantza bat topatu zituen Ertzaintzak. Autoaren abiadura-palankaren ondoan antzeko edukia zuten beste hiru poltsa txiki zeuden, agenteek aurkitutako tabako pakete batean.
Inplikatuak berak aitortu zuenez, speeda zen; aurkitutako drogak 250 gramo inguru pisatzen zituen guztira. Ondorioz, gizonezkoa atxilotu egin zuten, eta akta abiarazi zioten alarma egoeran ezarritako neurriak ez betetzeagatik.
Beranduago, atxilotuaren etxea miatu zuten Ertzaintzako Txakur Unitatearen laguntzarekin. Hainbat substantzia sorgorgarriren kopuru txikiak eta pastillak aurkitu zituzten bertan, baita 460 euro ere; Ertzaintzaren arabera, estasia eta kristala ziren topatutako substantziak.
Atxilotua asteazken goizean eraman dute epailearen aurrera, dagozkion polizia eginbideak amaitu ostean.